U guvernu riunitu si trova,
pi sta crisi i malanova.
Stu maru nenti seppi,
a l’intrasattu si seppi.

Poviru pantaluni!
Nui, poviri minchjuni.
Ricchi e evasori,
sunnu veri trisòri.

Non si ponnu tuccari,
non sannu pagari.
Stu guvernu i sapi trattari,
a facci i cu ndav’a lavurari.

Mancu esti sicura,
a tridicesima si scura.
S’u dirigenti è spraudèri,
a Natali, pi ttia, sulu prejeri.

Evviva, evviva pantaluni,
sturdutu d’i tevilisiùni.
Ludi e ciricensi,
Peppi tu sai e ndi pensi.

U fu quasiddiu,
fici scola i stu pizzìu.
Ndi parra i rigòri,
riccu sensa russori.

Ancora ridi e spandi,
ferragustu i carrijalandi.
P’a Salina lestu decretu,
u carbuni non faci fetu.

Ghoriu ndi mbija,
pi na stritta via.
U ghjazzu non meri,
si spirdìu d’ajeri.

A luna stasira,
tunda ndi gira.
Ndi mira,
ndi luci l’agghjra.

Si smovi nu ramu,
na cuda fanatica vardamu.
Sberta scumpari,
ndi voli zannijari.

Ghoriu si sciala,
i so trisòri ndi rigala.
Ntica a so parra,
sona e ndi mbarra.

I jornu a Furrìa,
ndi rifrisca e ricrija.
Ndi dinnu i mulini,
sciutti e sensa farini.

A luna scurri,
dorminu i murri.
Stu tempu si sperdi,
i chiddu chi perdi.

Ghoriu risenti,
i stu tempu prisenti.
A Rifudi i tri porti,
su perti e non risorti.

U parramentu chjudiru,
anzi no, u rjapriru.
Pi nu sulu jornu,
Giuliu leggi u so talornu.

A Roma pimmi lavura,
Mbertu cala cu sta calura.
E Robbertu, u dentista,
cantuneri i muru jetta a vista.

E chidduchiffu, quasiddiu,
no capisci u so pizzìu.
A cosa sendu seria,
a so battuta è sempri feria.

La ‘Ropa chi ndi sarba,
a sti turduni nci garba.
A patti e cundizzioni,
pi nui poviri minchjoni.

Giuliu ndi sapi tanti,
cu saluti e contanti.
Cu Maurizziu e Gnazziu,
st’Italia paga u so dazziu.

Guvernu sensa voti,
si teni comu poti.
I Romanu e Scilipoti,
s’i porta pi doti.

Ciangi u mediu cetu,
nudu d’avanti e d’arretu.
I sta cambiala firmata,
sapi sulu i cu è pagata.

Chiddu pensa e so prucessi,
a ll’Italia chistu nci dessi.
E so aziendi e prufitti,
l’Italia cusì vosi e si vitti.

I so versi,
non su persi.
Tantu pprezzati,
pi l’Italia chiamati.

Don Sesu, pariva nenti,
nti stu paisi sputtenti.
Assai su i serventi,
i cu tuttu sapi e si senti.

E i Cuncettu si spirdìu,
poeta finu chi tantu scrivìu.
E i Guidu fundu eccomu,
versu galipatu mai domu.

E i Mariu, sula dda petra,
i stu letteratu non rretra.
E u pruvissuri Titu,
u so versu, p’u medicu, scolpitu.

Sta casa malandata,
o paisi vecchiu sdirrupata.
Nu lamentu i ddi mura,
nasci e si ddimura.

Sul’a Mmeculata risisti,
casa i nu poeta chi nsisti.
Melitu paisi persu,
sensa casa e sensa versu.

E’ veru ricriju,
signu d’u ternu Ddiu.
A so luci,
chi ndi dduci.

Ndi parra,
duci ndi mbarra.
Ndi cura,
d’ogni sumpistura.

Palòra mai ditta,
silenziusa e biniditta.
Palòra chi non ffendi,
e poviri debbuli difendi.

Nti st’epica rumurusa,
esti nu pinsèri i scusa.
D’a tevilisioni scunchjuduta,
ndi sarba e juta.

A notti, so soru,
a luna so trisòru.
U jornu ndi currija,
E u suli ndi caddija,

U mari,
ndi voli ncarizzari,
A campagna,
certa cumpagna.

A matina chi brisci,
silenziusi su i pisci.
U jornu ti spetta,
l’aria non è netta.

U vinu i Palizzi,
ti sana ch’i so ducizzi.
Non ti tradisci,
u so silenziu mai finisci.

Mari grecu,
cu ti dici paddecu!
N’o senti l’ecu,
d’u poeta cecu!

U sannu i derfini,
i ddi tempi sini.
U mari d’Ulissi,
carmerìa vulissi.

Cu ti ffendi,
i vileni si spendi.
I derfini u sannu,
è l’omu stu dannu.

I so brazza su pinni,
sta terra i tinni.
I so anchi na cuda,
a virgogna i ll’omu è nuda.

I so cerchi festanti,
i so grida su canti.
I nostri frati pisci,
è Ddiu chi ndi nducisci.

Tempu d’arciura,
u mari ndi culura.
Tempu i tirannìa,
a nostra vita penija.

I nostri frati pisci,
u mari si schiarisci.
I Cassandra mbasciaturi,
d’i so grida e duluri.

Ridi omu, non capisci,
sti nostri frati pisci.
A Piero e Luigi,
stu tempu n’e capisci.

Vosi mmutiri,
non si voli sintiri.
Schjattafeli,
a so palòra nu meli.

D’i so caracòli,
stanchi denti e moli.
U sulialliuni,
sbarruatu minchjuni.

Non dici ma senti,
u mundu no risenti.
I giurnali janchi,
i scrittu su stanchi.

I tevilisioni duri,
su morti i so figùri.
Nternetti sti mari,
sicchi sti hjumari.

Torna, mai partìu,
tanti s’u spirdìu.
E’ veru cumpagnu!
sanamalati sulagnu.

A so cumpagnia,
mai si currija.
U japri u posi,
i so palòri su rosi.

Comu, cu esti?
Sensa ti mpesti.
Libbru si chiama,
sensa, a vita brama.

T’u pigghjasti,
e no nd’u dassasti?
Riggiu cu iddu rinasci,
i mal’erba ora si pasci.

Spiranza vera,
duci e sincera.
Rriggiu spera,
i notti a so lumera.

Italu è forti,
ngrata sorti.
S.Giorgiu japri i so porti,
o tribbunali subbisci torti.

A chjazza d’u fasciu,
non è cchiù nu scasciu.
Pi iddu su i minacci,
o Granillu duna a so facci.

Rriggiu rispira,
a ndranghita suspira.
U Rriggitanu,
a Rrriggiu non è stramanu.

Signuri…pirchì?
Poviri simu cusì.
A To Curti celesti,
Italu si sedi ed esti.

Nui orfaneddi i baliaggiu,
sensa meta stu viaggiu.
Rriggiu è vacanti,
palazzu d’i mercanti.

Signuri…pirchì?
Dandi nu signu si.
N’e sapimu i to fini,
Rriggiu è nte spini.

Italu ndi mmanca,
a so risicedda mai stanca.
U so sempiu viventi,
Rriggiu cu sapi si senti.

I ‘stati esti duci,
rifrisca sensa bbuci.
A so vista ndi luci,
i notti na culla a so vuci.

U suli na hjara,
c’u mari ripara.
Sensa pinsèri,
pensi aund’eri.

U casteddu cadutu,
sensa turri è pirdutu.
I notti scumpari,
nenti sapi u mari.

I jornu cumpari,
e malispiriti dassati stari.
Na majia pari,
nenti dici u mari.

I ‘stati si vesti,
i nu linzòlu celesti.
I notti scumpari,
a turri ora è a mari.

O casteddu sensa turri,
c’u nu smendu ti mburri.
A notti si lamenta,
u mari argentu difenta.

I ‘stati esti duci,
spetta cuci cuci.
Terra cu assai cruci,
jornu portindi luci.

E’ firutu,
si senti pirdutu.
Ora spetta,
a so vita è netta.

Tibberiu penza,
a so vita è a scadenza.
A libbirtà a so bandera,
puru pi ccu non spera.

Attimi sensa fini,
u vonnu mortu i caìni.
Rumpìu i catìni,
pi Tibberiu sulu spini.

Scantati su i caìni,
st’attimi i so catini.
A Natura muta,
a so furia stuta.

Non voli pagari,
a cu i sgarru voli campari.
Focu fermatìndi,
fora cuntinua e vindi.

Rriggiu nu modellu,
si sperdi i stu fratellu.
Su lagrimi mari,
pi ccu serbu non voli campari.

Tibberiu risisti,
segui e so pisti.
Dinunzia,
Rriggiu rinunzia.

U lavuru e a leggi,
c’a so famigghja u rreggi.
Eroi a non vuliri,
normali u so patiri.

Libera u susteni,
o so hjancu si teni.
Surdi l’istituzzioni,
Tibberiu è na rivoluzioni.

Dedicata a Tiberio Bentivoglio